A chantar m'er de so qu'eu no voleria,
tant me rancur de lui cui sui amia;
car eu l'am mais que nuilla ren que sia:
vas lui no’m val merces ni cortesia
ni ma beltatz, ni mos pretz, ni mos sens;
c'atressi'm sui enganad' e trahïa
Com degr' esser, s'eu fos dezavinens.
D'aisso’m conort, car anc non fi faillenssa,
Amics, vas vos per nuilla captenenssa;
anz vos am mais non fetz Seguis Valenssa,
e platz mi mout quez eu d'amar vos venssa,
lo mieus amics, car etz lo plus valens;
mi faitz orguoill en digz et en parvenssa,
et si etz francs vas toutas autras gens.
Be'm meravill com vostre cors s'orguoilla,
amics, vas me, per qu'ai razon qu'eu'm duoilla;
non es ges dreitz c'autr' amors vos mi tuoilla,
per nuilla ren qu'eu's diga ni acuoilla.
E membre vos cals fo’l comenssamens
de nostr'amor! Ja Dompnedeus non vuoilla
qu'en ma colpa sia'l departimens.
Valer mi deu mos pretz e mos paratges
e ma beltatz e plus mos fins coratges;
per qu'eu vos mandad lai on es vostr' estatges
esta chansson, que me sia messatges:
eu vuoill saber, lo mieus bels amics gens,
per que vos m'etz tant fers ni tant salvatges;
no sai, si s'es orguoills o mal talens.
Mais aitan plus vuoill li digas, messatges,
qu'en trop d'orguoill o ant gran dan maintas gens.
- 专辑：Portals of Grace
- 歌手：Azam Ali
- 歌曲：A chantar m'er
